Eble vi atentis al fakto, ke de kelkaj numeroj nia magazino iĝis pli literatura. Fakte de multe da numeroj ni legas la verkon de Prus, en traduko de Kabe, La faraono, kaj aldone estas kelkaj aliaj rakontoj miaj kaj de aliaj aŭtoroj beletraj. Mi vere opinias, ke literaturo igas nin pli kompletaj kaj trankvilaj. Tamen, ne timu la leganto, ke nia sinteno ade estos sociala kaj demokratia, kaj tiuj temoj ne mankos en nia revuo.
La lastan numeron ni parolis pri la Dua Hispana Respubliko, kaj finis publikiĝi mia novelo politika Vivu la Respubliko! De ĉi tiu numero ni publikigas la novelon religian La peko de l' taliban', aŭ La malgaja vivo de Abdul' Sale', anstataŭ la pli mallongan verkon Avo kaj nepo, kiun ni publikigos post ĉi tiu. Se leganto deziras publikigi sian beletraĵon, ni volonte ricevos ĝin por konsidero.
Antaŭ nelonge okazis la 86ª datreveno de la starigo de la Dua Respubliko en Hispanio, sed sufiĉe oni jam parolis pri tio, kaj sufiĉe malpli pri alia grava datreveno por ni, geesperantistoj: antaŭ unu jarcento la inventinto de nia lingvo kaj fondinto de nia Esperanto Movado mortis en Varsovio la 14-an de aprilo 1917 pro kormalsano.
Ĉiu esperantisto konas pri li, la Fondinto. Sed eble oni ne scias, ke li estis granda verkisto, ankaŭ. Post lia Unua Libro de Esperanto en la franca, rusa kaj aliaj lingvoj, li verkis multajn aliajn librojn, kelkfoje originalaĵojn, kaj ankaŭ multajn aliajn tradukojn, inter ili La Sankta Biblio. De tiam multaj aliaj aŭtoroj verkis en nian belan lingvon, kaj oni jam povas diri, ke ekzistas tute homara kulturo pere de Esperanto.
Pro tio nia magazino jam iĝas pli kultura kaj literatura, iom post iom, ĉar nia vera revolucio estas kleriga kaj perbeletra.
Jesuo.
