Antaŭ kelkaj jaroj estis scientisto kaj disvastigisto pri scienco, Felikso Rodríguez de la Fuente, kiu mortis akcidente kaj oni sopiris al li per kanto Amiko Félix, kiun kantis infanoj, ĉar li multe faris pri ili kaj pri aliaj hispanoj, ĉar interesigis nin pri scienco.
Li ja estis bonulo. Pro tio mi ne povis ne pensi pri li kiam mi vidis en televido, ke S-ro Alfredo Pérez Rubalcaba deziras alproksimiĝi al voĉdonantaro, supozeble la popolo, dirante, ke oni ne nomu lin Rubalcaba, sed Alfredo. Sed kiu estas tiu Alfredo?
Alfredo Pérez Rubalcaba estas doktoro pri Ĥemiaj Sciencoj, kiu studis kaj gajnis postenon kiel instruiston en Universitato Komplutense de Madrido, kaj ankaŭ instruis en Germanio kaj en Francio, universitatoj de Konstanzo kaj Montpeljero, antaŭ ol li ekdediĉis sin al politiko.
Tio okazis je 1982, kiam Felipez González Márquez venkis la balotadon je 1982. Li tiam estis Ministro pri Edukado, kaj poste iĝis Ministro Pri Prezidanteco kaj Pri Rilatoj kun Parlamento. Oni suspektis ĉiam pri lia gvidado de la skandala agado de GAL, kontraŭterorisma terorista grupo da krimuloj rikoltita inter policanoj, sed neniam oni pruvis ion ajn kontraŭ li aŭ la Prezidanto mem. Oni memoru, ke Ministro Barrionuevo kaj Ĝenerala Sekretario Rafael Vera estis enkarcerigitaj pro tiuj krimoj. Kiam Jozefo Ludoviko Rodríguez Zapatero kandidatiĝis, je 2004, li organizis kaj zorgis pri ties politika kampanjo, sukcese, ĉar Zapatero iĝis prezidanto de Hispanio. Kvankam dekomence li iĝis nur voĉportulo de la Grupo Socialisma en la Hispana Parlamento, je la 11a de aprilo de 2006 li iĝas Ministro de l' Interno, kie li gvidis la malkreskigon de la nombro de trafikakcidentoj kaj lukton kontraŭterorisman, kvankam oni ne multe laŭdas lian agadon pro tio, ofte kritikata kiel tro aŭtoritatismaj leĝoj, kiuj enkondukis la sistemon pri punktoj en stirpermesilon, kaj ankaŭ oni kulpis lin pri la skandalo de l' trinkejo Fajsan', kiu rezultis kiam policano avertis grupon de teroristoj, kiuj estis en tiu trinkejo, ke aliaj policanoj estas tuj arestontaj ilin La teroristoj foriris ĝustatempe, kaj kelkajn semajnojn poste ili faris atencon en flughaveno de Madrido, en kiu mortis du homoj. Tamen la interveno de la Ministro ankoraŭ ne estas pruvita.
Kiam la Ministrino pri Defendo, Karmen Ĉakon', estis graveda, li anstataŭis ŝin pri ŝiaj devoj dum unu monato, de majo al junio de 2008, kaj je la 21ª de oktobro de 2010 li iĝis Vicprezidanto Unua de l' Registaro kaj Ministro Voĉportanta de l' registaro sen lasi sian ministerion pri l' Interno. La 27a de majo de 2011 lia partio, PSOE, elektis lin kiel kandidato por la venonta balotado, sed nur la 8an de julio li rezignis pri siaj postenoj en la registaro. La Ministrino pri Defendo ankaŭ volis kandidatiĝi por la Prezidanteco de la Registaro de Hispanio, sed verŝajne oni konvinkis ŝin rezigni pri sia peto pri Primaraj Voĉdonoj (kaŭkuzaj, usondirite).
Nun ŝajnas, ke li deziras aperi kiel novalveninto en la politikan vivon de Hispanio, laŭ tio, kion li diras. Li surprizis nin antaŭ nelonge per parolado per kiu li diris al ni, ke li scias kion fari por krei laborpostenojn, kaj por eliri la krizon, kiu tiom kruela estis en Hispanio al gelaboristoj. La vivokosto plialtiĝis pli ol iam antaŭe, sed li, laŭ lia diro, scias tion, kion oni faru por eliri la krizon. Oni sindemandis publike, kial li ne diris tion antaŭe. Ekzemple, kiam lia estro, Prezidanto Zapatero, diris, ke la krizo ne ekzistas, ke paroli pri krizo estas iĝi malpatrioto, kaj ke Hispanio estas en la Ĉampiona Ligo pri Ekonomio en la mondo. Oni miras, ke li ne tiam diris al nia plej alta responsulo pri tio, kio okazas.
Li diras, ankaŭ, ke oni devas apliki altan impoŝton al riĉuloj, por ke ili kunlaboru eliri la krizon. Tiel farante, li klarigas, oni ekhavos mil milionojn da eŭrojn. Sed lia estro atingis nenion per dektrifoje tiu kvanto, kiun li dediĉis al Plano E. Kial li ne konsilis al ZP tiam ion pri sia magia recepto? Tamen, plialtigi impoŝton ne multe helpas plialtigi la laborpostenojn, ĉar hodiaŭ ne estas malfacile forpreni sian monon en aliajn landojn de la Eŭropa Komunumo cele al investo, se oni ne allogas ilin investi ĝin ĉi tie. Kaj taksi monon, kiu jam pagis impoŝton estas nejusta kaj maliluziiga ŝpari monon. Suferos pro tio multe pli ne tiom riĉaj mezklasuloj, kiuj deziras nur ŝpari monon por maljuneco. Ĉar elspezita mono ne pagas. Aliflanke, li ankaŭ ne konsilis al sia ĵusestro pri meĥanismo detekti laboristan perforton, kiel ekzemple la situacion de multaj gelaboristoj, kiujn oni dungis por duonlabortago, sed tamen oni devigas fari tutan labortagon, kaj ankaŭ aliaj, kies labortago entutas 14 horojn aŭ pli. Ili ne kuraĝas denonci tion, ĉar ili timas perdi sian postenon pro tio. Li tion scias certe, ĉar li estis la plej longdaŭra ministro pri l' interno en la historio de Hispanio.
Antaŭ kelkaj tagoj teroristoj de ETA diris, ke ili ne plu mortigos, kaj atente atendas la registarojn de Hispanio kaj Francio diskuti kaj negoci pacoprocedon. Amiko Alfredo komentis pri tio, ke nun komencas periodon pacan en Hispanio, ĉar demokratio venkis teroriston. Sed mi ne vidis, ke teroristoj estas en karceroj senarmigitaj kaj arestitaj de polico, sed nur ke ili mem, propravole, deziras ne plu uzi armilojn, kiujn ili ne rezignas. Mi dubas, ĉu La Kandidato socialisma eraras, ĉu li rekte primokas la loĝantaron de Hispanio.
Ankaŭ li parolas pri tio, kion oni devas fari, sed ne kiel li farus tion, se li venkus la balotadon. Sed rigardante tion, kion la registaro kies vicprezidanto li estis, faris aferojn, oni povas dubi, eĉ timi, pri la procedoj. Ekzemple, pri subvencioj li diris eĉ ne unu vorton. Antaŭ du tagoj ministrino Lejre Paĥin' disdonis pli ol 200 000 eŭrojn por neregistara organizo (NRO) prezidita de la edzino de S-ro Rubalkaba mem. Ankaŭ aliaj grandaj kvantoj sinsekve iras al minoritataj asocioj, kiel tiuj de Lesboj kaj Samseksemuloj, en tiuj ĉi tempoj de krizo ekonomia. Ŝajnas ke al socialistoj gravas multe pli ideologio kaj ties disvastigo ol ekonomio de ĉiuj hispanoj.
Sed Sinjoro Rubalkaba ankoraŭ ne diris eĉ unu vorton pri tio, kion li faros por malapartigi la diversajn partojn de la popolo. Kiam tio, kion oni interkonsentis nomi demokratio venis en Hispanio je la lasta sepdekaj jaroj, la popolo jam ne plu memoris pri nia terura intercivitana milito. Fakte, la plej granda parto da hispanoj eĉ ne konis ĝin. Sed la Registaro socialisma faris la Leĝon pri Memoro Historia, per kiu malnovaj vundoj venis denove inter hispanoj: preskaŭ ĉiu familio havas murditojn el alia flanko dum la milito, kaj iliaj kadavroj tre ofte neniam aperis. Nun oni eltombigas multajn ostojn, kaj kulpigas "la alian flankon" pro ties murdojn, sed ofte okazas, ke la ostoj ne apartenas al tiuj, kiujn oni celas diri, sed al aliflankanoj, kreante tiel malbonajn sentojn tie, kie la konflikto jam estis solvita. Ŝajnas, ke oni deziras venki la venkintojn okdek jarojn poste. Oni neniam devus atenti al tiu leĝo, kaj oni neniam devus krei tiun leĝon, kies utilo certigas nur novan apartigon inter gehispanoj. Sed Kandidato Rubalkaba ankoraŭ diris nenion pri tio, ĉu li intencas malaperigi tiun nekonvenan leĝon.
La Movadon 15M, kiu aperis tuj preskaŭ la balotado municipan kaj aŭtonomaj okazintaj la 22an de majo, protestis kontraŭ multe da aferoj, kiujn mi ankaŭ priprotestas. Dekomence ili pravas. Sed ili tute ne pravas laŭ la rimedoj, kiujn ili uzas. Ili okupis publikan spacon perforte kaj kriaĉe. Sed tiutempa Ministro pri l' Interno, kaj sekve estro de la polico en la tuta nacio, S-ro Alfredo Rubalkaba, faris nenion pri ĝi. Rezulte, multe da komercistoj perdis monon kaj civitanoj de Madrido kaj aliaj urboj ne povis libere promeni tie, ĉar la placon okupis tendaro da protestuloj. Mi ne povas ne pensi, ke ĉio validas, se konvenas al ministro, kaj tio eble donas al ni ideo pri tio, kio okazos, se S-ro Rubalkaba estas nia nova Premiero.
Kaj finfine ni parolu pri la familio: ĉu kandidato Rubalkaba kreos leĝojn, kiuj protektos familion? Nun en tiu ĉi krizo, familio estas solvo por miliono da homoj, kies familianoj estas maldungaj. Ili subtenas sin dramatike nur danke al helpo de geavoj kaj proksimaj familianoj. La ŝtato faras nenion por ili. Tamen, ne estas sociala danĝero nun en Hispanio ĉar familio apogas ilin, kaj ankaŭ pro tio, ke Jesuo Forlasita, religia,katolika asocio, disdonas manĝadon senpagan. Ĉu Kandidato Rubalkaba provizos ion, por ke en tiuj situacioj nek familio nek religio devos provizi, sed la ŝtato, kiel estas ĝia devo? Laŭ la regado de José Luis Rodríguez Zapatero ni vidis kelkajn leĝojn, kiuj atencas kontraŭ familio rekte kaj nerekte: Leĝo pri divorco (oni povas divorciĝi en Hispanio en nur tri monatoj, laŭ la deziro de nur unu el la geedzoj); deksesjarulino povas aborti sen kono de ŝiaj gepatroj; gesamseksemuloj povas adopti geinfanojn, eĉ se ili bezonas referencon pri ambaŭ seksoj... Kaj ili eĉ celis krei novan leĝon pri Morto Digna, kiu ebligos familianojn decidi fruigi la morton de maljunuloj kun malbona sano. Sed samtempe al milionaj subvencioj al hispana kinarto kaj aliaj homaj agadoj proksimaj al ideologio de socialisma partio, en Hispanio oni subvencias naskon da infanoj per malplej da mono en la tuta Eŭropo. Ĉu Kandidato Rubalkaba denove apogos familion per subvencio al novnaskito, al aĉetado da libroj por deviga edukado, por alproksimigi la universitaton al tiuj, kiuj ne havas la teruran kvanton da mono, kiun oni postulas por eniri tiun studnivelon?
Sufiĉe da demandoj mi prezentas nun ĉi tie. Mi timas miajn proprajn respondojn, kaj pro tio mi ne prezentas ilin antaŭ vi, leganto. Sed mi invitas vin cerbumi pri ili, kaj respondi al vi mem antaŭ ol vi decidas al kiu kandidato vi premios per via fido. Kaj ankaŭ al kiu politika partio vi donacos monon, ĉies monon, per via voĉdono.
